LAOAG CITY – Inyestorya ni Ms. Justine Mae Andres iti Brgy. Cali iti ili ti Dingras ti napasamak idi naiyuswat ti search warrant operation iti mismo a pagtaenganda gapu iti panagikot ti paltog ken balbala ti ama na ken subject ti operasuon a ni Benjamin Andres y Villanueva.
Segun ken ni Andres, agarup 5:50 ti bigat idi Domingo, Marso 14 ket adda dagiti nagturong a nakasibilyan a pulis iti pagtaenganda.
Kuna na nga nga idi nakastrek dagitoy iti pagtaenganda ket dita a tinutukan da ti ama na ti paltog ken adda ti maysa a pulis a nagturong iti uneg ti kwarto na nga isu met ti maipagarup a nangipan ti granada.
Inbatad na a namula a granada ken dinamag na nu apay nga inkabil da daytoy iti kwarto.
Nu pay kasta, kuna na a nagginagaw da laeng iti nakasibilyan a pulis ken idi naagaw ti pulis ket ginandat na ti nagtaray ngem maipagarup a naguy-guyod ken binekkel ti maipagarup nga agnagan ti Ruben Patricio ken kalpasan na ket insublida metlaeng ti granada iti kwarto.
Kuna na nga awan a pulos ti opisyal ti barangay a nangbayabay kadagiti pulis ken saanda nga inyam-ammo ti bagbagi da sakbay a simrekda iti pagtaengan.
Innayun na a naulod-ulod pay ti ina na a senior citizen ken pinilit na ti sumrek iti pagtaenganda kalpasan a rimuar ngem maipagarup a saan a pulos nga inpalubos dagiti pulis.
Inbatad na a nagpakpakaasi pay a sumrek bayat a maiyus-uswat ti operasyon gapu ta adda ti lola na iti uneg a maysa a bed ridden ken masaksakit.
Kuna na nga idi napalubusan a simrek ket dita a kinita na ti lola na nga arigna marigatan aganges ken nababa ti blood pressure ken nakapsot ti pulso na.
Gapu iti daytoy, patien na ken ti pamilya na a nadegdegan ti an-anayen ti lola da gapu iti napasamak rason a pimmusay kalpasan ti napasamak.
Inpakaamo ni Andres a desidiso ti pamilyana nga agipila ti kaso kontra kadagit pulis gapu iti napasamak.
Maipalagip a natiliw ni Benjamin Andres y Villanueva idi domingo babaen ti naiyuswat a search warrant operation.
Nakumpiskar kenkuana ti maysa a calibre 38, sangapulo a bala, lima a bala ti calibre 35 ken hand grenade.
Maitudtudo pay daytoy a suspek ti pamamaltog a napasamak iti ili ti Marcos itay napan a bolan.
Kabayatanna, inbatad ni Brgy . Chairman Teddy Rosqueta iti Brgy. Cali iti ili ti Dingras nga awan ti nangayab kenkuana a kameng ti PNP para iti pannakaiyuswat ti search warrant operation iti pagtaenganda Andres.
Segun ken ni Rosqueta, naamoan na laeng nga adda ti operasyon kalpasan nga intawag kenkuana ti kagawad a karruba ti subject.
Kuna na a dagus na met nga inayaban dagiti opisyal ken tanod ken nagturongda iti pagtaengan ket dita nakita na dagiti pulis.
Nu pay kasta, inbatad na a nadanunan na nga agik-ikkis ni Justine Mae Andres nu sadino nga ipetpetteng na a nagimula ti granada dagiti nakasibilyan a pulis.
Mainaig iti daytoy, inpakaamo na nga apaman a dinamag na kadagiti pulis ti ranta da ket dita nga inpakita da met kenkuana ti search warrant.
Inbatad na a kalpasan a nabasa na ti search warrant ket dita pay laeng a nairugi ti panagsapul dagiti otoridad iti pagtaengan ti pamilya Andres.
Patien met ni Rosqueta a ti pannakaiyuswat ti search warrant operation iti nadakamat pagtaengan ket gapu iti maibatbato nga alegasyon iti subject a suspek daytoy ti napasamak a pammaltog iti ili ti Marcos iti kallabes.
Kabayatanna, inbunannag ni PCapt. Joseph Calderon, ti hepe ti PNP-Dingras a mabalin a mangipila ti maiyannatop a reklamo ti pamilya ti subject ti operasyon iti Brgy. Cali iti ili ti Dingras a ni Benjamin Andres y Villanueva.
Daytoy ket tapno masuportaran da ti alegasyonda kontra kadagiti kameng ti PNP a nangiyuswat ti operasyon.
Kuna na a sidadaan ti nailian a pulisya a mangawat ti aniaman a reklamo wenno blotter nga ipila ti pamilya agsipod ta adda ti karbengan dagitoy.
Nu pay kasta, inlawlawag na a naurnos ken nasurot amin a protocols iti pannakaiyuswat ti nasao nga operasyon.
Inlawlawag ni Calderon a kas umuna nga addang sakbay ti operasyon, inpresentar dagiti pulis ti search warrant ken inyam-ammo da ti bagbagida.
Kuna na a nga adda pay ti barangay officials a nagbalin a witness sakbay a nairugi ti search warrant operation
Innayun na a naikkat pay amin a saan a kasapulan a suot dagiti nagbirok a pulis iti uneg ti pagtaengan sakbay a simrek dagitoy.
Innayun na a kalpasan ti operasyon ket napirmaan amin a masapol a mapirmaan babaen kadagiti witness pakairamanan ti Certificate of Orderly Search.
