LAOAG CITY – Nagpositibo ti inyuswat ti PNP a search operation iti pagtaengan ni Mr. Daniel dela Rosa y Depusoy aka “Danny”, residente iti Barangay 1, San Lorenzo ditoy ciudad ti Laoag.
Nakalanad iti search warrant a ti sukimaten dagiti otoridad ket maysa a kalibre 45 a paltog ken balbala.
Nupay kasta, ti naukag ti search team ket maysa a granada, maysa a pellet gun, aglatlati a cal. 38 revolver ken holster.
Iti pannakisarita ti Bombo Radyo Laoag kenni Dela Rosa, naglikudan na a kukua na ti narekobre a granada gapo ta ti lugar a nakaalaan iti daytoy ket iti mismo a pagturturugan da iti asawa ken anak na.
Gapo iti daytoy, patyen ni Dela Rosa a naimula ti nasao a granada.
Kabayatanna, inbatad ni Police Major Adriano Licudan, deputy chief of police ti PNP-Laoag a kalpasan a naberipikar da nga awan ti lisensya dagiti ikot ni dela Rosa ket inaplikaran da ti search warrant ken inyuswat da ti operasyon.
Inpetteng na a sakbay a simrek ti search team ket sinurot da ti proseso ken nasigurado nga awan ti anyaman nga iggem da.
Kunana a mabalin a nalipatan laeng ni Dela Rosa nga adda ti indulin na a granada iti uneg ti pagtaengan na rason nga arig na nasdaaw no apay nga adda ti nasao nga eksplosibo.
Innayon na a maka-ammon ton ti kampo ni Dela Rosa nga agsungbat no anya ti maipila kenkuana a reklamo seknan kadagiti narekobre da nga armas.
Mainaig iti daytoy, binalakadan ni Licudan ti publiko a no kalikagom da ti maaddaan ti armas ket suruten da ti umno a proseso ken masapol nga adda ti dokumento.
