LAOAG CITY – Balligi ti naiyuswat a search warrant operation iti Barangay Hilario iti ili ti Banna.
Nabigbig ti subject ti operasyon a ni Benjamin Lorenzo y Lim aka Jay-Ar, agtawen ti 39, naasawaan ken residente iti nadakamat a barangay.
Naisayangkat ti operasyon babaen iti nagtipon a pwersa ti Banna Municipal Police Station kas lead unit nga indaulwan ni Police Capt. Jackson Sugayen iti superbisyon ni Police Col. Julius Suriben, PIU-INPPO, PDEU-INPPO, 103rd, RMFB, 2nd PMFC, RDEU1 ken RID1.
Ti Search Warrant ket inparuk-at ni Hon. Myra Sheila M Nalupta, Executive/Presiding Judge iti Regional Trial Court Branch 65 ditoy ciudad ti Laoag gapo iti panaglabsing iti Sec.11, Article II iti Republic Act 9165.
Segun met kenni Sugayen, naala ti operasyon partikular iti kwarto ti pagtaengan ni Lorenzo ti walo a sachet a naglaon ti maipagarop a shabu, maysa nga hand grenade, pito a bala ti Caliber 5.56; pito a bala ti kalibre 45 a paltog; dua a pidaso a bala ti Caliber 9MM; dua a pidaso ti Caliber 357 magnum; dua a pouch nga agmaris ti asul ken brown; maysa a shoulder bag ken ti 16,360 a pisos.
Inbatad na a namunganay ti operasyon iti nairepreport dagiti karruba ni Lorenzo a karaman daytoy iti maipagarop a pannakaiwaras ti iligal a droga.
Kunana nga adda pay ti naipatulod kadakuada a ladawan a nakagatang ti maseknan kenni Lorenzo ti maipagarop nga iligal a droga rason nga inberipikar da ken naduktalan a daytoy ket datin a natiliw gapo iti droga ken maibilang nga High Value Individual.
Inlawlawag na pay nga adda ti mismo maysa nga indibidual ti napan iti istasyon ti pulisya iti Banna a nangibaga a nakagatang ken laklakoan isuna ni Benjamin ti iligal a droga agingga a napan da inlawlawag iti korte.
Kalpasan daytoy, adda ti naiparuk-at a dua a search warrant iti partikular iti kwarto ti pagtaengan ni Lorenzo ken ti lugan na.
Inpakammo pay ni Sugayen a malaksid iti pannakairaman ni Lorenzo iti iligal a droga iti kallabes ket simmuko pay daytoy iti Provincial Drug Enforcement Unit ditoy ciudad ti Laoag.
Mainaig iti daytoy, kuna ni Sugayen a naglikudan ni Lorenzo a kukua na amin dagiti nakumpiskar iti pagtaengan da.
Kabayatanna, iti agdama ket adda iti kustdiyar ti Philippine National Police iti ili ti Banna ni Lorenzo ken manamnama a mapilaan ti kaso.
