LAOAG CITY – Manarimaan a mapaspasamak ti grass fire iti Barangay 16 ditoy siudad ti Laoag.
Insigida a nagresponde ti Bureau of Fire Protection ditoy siudad ti Laoag pakairamanan ti Bureau of Fire Protection iti ili ti San Nicolas ken City Disaster Risk Reduction and Management Office.
Alisto a dimmakkel ken nagramram ti apoy gapu iti kinapigsa ti pul-oy ti angin iti lugar.
Gapu iti daytoy, marigatan dagiti bumbero nga umasideg tapno masebseban ti dumakdakkel nga apoy nangruna ket napuskol ti asok.
Mainaig iti daytoy, rumrummuar nga adda ti nagpuor a posible a nangitunda iti napasamak a grass fire.
Nupay kasta, saan pay a masinunuo dagiti otoridad iti mabalin nga adda iti likudan ti insidente.
Naammoan a nagturong iti lugar dagiti sumagmamano nga opisial iti lokal a gobierno.
Kabayatanna, bayat a maisursurat daytoy a damag ket agtultuloy pay laeng ti panangsebseb dagiti bumbero ti grass fire.
