LAOAG CITY – Maysa a Great Wall of China sculpture iti Guangzhou, China ti nakagun-od ti baro a world record.
Kinumpirmaran ti records keeping organization a Guinness World Records a ti City of Guangzhou ti baro a record holder ti titulo a “Largest Balloon Sculpture of a Landmark.”
Daytoy ket kalpasan a makabukel ti maysa nga sculpture a replica ti Great Wall of China nga addaan ti kaatiddog a 127.95 a kadapan.
Naammoan a tapno makaaramid ti sculpture, nagusar ti 100 a ribu a pedaso ti lobo nga agmaris ti balitok.
Iti panagtitinnulong dagiti 20 balloon artists, dimmanon ti tallo nga aldaw sakbay a nakumpleto ti intero nga sculpture.
Ti world record breaking event ket inorganisar ti China Senior Health Association tapno magutigot dagiti senior citizens a papigsaenda ti immune system.
In-display ti sculpture iti sango ti Canton Tower tapno simbolo ti ancient ken modern landmark ti China.
