LAOAG CITY – Inbatad ni National Bureau of Investigation (NBI) Director Melvin Matibag a naduktalan ti ahensia ti maysa a grupo a mapapati nga ag-groom wenno manggutgutigot kadagiti menor de edad nga agaramid iti kinaranggas.
Rimmuar ti nasao nga impormasyon kabayatan ti panagimbestigar ti NBI iti pammaltog iti Ateneo de Zamboanga University (AdZU) Junior High School idi Agosto 18, no sadinno nga iti maysa a 14-anyos a Grade 8 student ket mapapati a nangpaltog ken nangi-livestream iti insidente iti Facebook.
Segun ken ni Matibag, adda group chat dagiti makunkuna a “groomers” a mangpuntiria kadagiti agtutubo nga agtawen iti 12 agingga iti 19. Mapattapatta nga umabot ti 1,000 a miembro ti grupo, kaaduanna ket Pilipino ngem adda met dagiti miembro manipud iti sabali a pagilian.
Kinuna ni Matibag a simrek ti National Bureau of Investigation (NBI) iti group chat ngem nawarawara daytoy iti saan nga agbayag a panawen.
Inbatad ni Matibag nga adda “initiation” ti grupo no sadinno a magutgutigot dagiti miembro nga agaramid kadagiti naranggas ken illegal nga aramid, agraman ti panagaramid iti bomba. Nupay kasta, beripikaren pay laeng ti National Bureau of Investigation (NBI) no konektado ti grupo iti pannakapaltog ti AdZU ken dadduma pay nga insidente ti kinaranggas iti pagadalan ditoy pagilian.
Makipagkita ti NBI, agraman ti Office of the Executive Secretary ken ti Department of Information and Communications Technology–Cybercrime Investigation and Coordinating Center, ken ni Meta tapno agkiddaw iti tulong iti imbestigasion.
Innayon ni Matibag nga i-profile ti National Bureau of Investigation (NBI) dagiti tattao a mangiburburay iti video ti pammaltog, pakairamanan ti posibilidad nga adda koneksionda kadagiti mapapati a groomers.
