LAOAG CITY – Naiyuswat ti ground breaking ceremony para iti pannakaipatakder ti baro a Laoag City Hall of Justice iti lote a kukua ti probinsya a masarakan iti Brgy. 2 ditoy siudad ti Laoag.
Segun kenni Supreme Court Chief Justice Diosdado Peralta, inkarina a masapul a maaddaan iti napintas a Hall of Justice a pagpaayan dagiti huwes, piskal ken abogado agraman kadagiti agkasapulan it hustisya.
Daytoy ket gapu iti arungaing da a marigatan da nga agtrabaho gapu ti panagdaan a Marcos Hall of Justice no sadinno nga adda dagiti paset na nga agubo iti danum no bilang agtudo ken dadduma pay.
Kuna na a babaen iti pannakaipatakder ti baro a hall of justice ket maaddaan ti napinpintas pay a hustisya para kadagiti agkasapulan.
Masapul met iti kooperasyon dagiti tattao kadagiti adda iti biang ti linteg para iti napaspas a panagtaray ti hustisya.
Innayon ni CJ Peralta nga abuten na ti sumagmamano a tawen ti pannakaipasdek ti pasilidad gapu ta dakkel a pasdek daytoy.
Saanen a dinakamat ni CJ Peralta ti pondo a mausar para iti baro a hall of justice.
