LAOAG CITY – Nagtalined ti takder dagiti Junior doctors iti ciudad ti Kolkata idiay India a saan da a tungpalen ti bilin ti Korte nga isardeng ti ipatpatungpal da a tignay protesta kontra iti pannakarames ken pannakapapatay ti trainee doctor iti state-run hospital iti nasao a ciudad.
Maipalagip a ti pannaka-rekobre ti bangkay ti agtawen ti 31 a doktor a babai ket nangitunda ti nalawa a tignay-protesta.
Natiliw ti maysa a volunteer iti ospital gapu iti krimen nga iti agdama ket agtultuloy nga im-imbestigaren ti federal agency.
Inpetteng dagiti doktor iti Kolkata a saan da nga isardeng ti mangiyuswat ti tignay-protesta ken saan da nga agsubli iti trabaho da agingga a saan da a magun-od ti hustisya iti pannakatay ti biktima.
Basar iti report, umaboten iti 23 a pasyente ti pimmusay iti nasao nga ospital gapu iti kaawan dagiti doktor a mangtaming kadakuada.
