LAOAG CITY – Suportaran ti grupo dagiti local officials ti nailungalong a pannaka-amendar ti political provisions iti 1987 Constitution, pakairamanan ti pannakaiyalud-od ti termino ti sumagmamano a naelektaran nga opisyal iti pagilian.
Iti panagdengngeg iti senado, inpeksa ti Union of Local Authorities of the Philippines (ULAP) ti suporta na iti Resolution of Both Houses (RBH) No. 5 a gagem na a mangamendar ti Sections 4 ken 7 of Article VI (Legislative Department); Section 4 ti Article VII (Executive Department); ken ti Section 8 ti Article X (Local Government) ti konstitusyon.
Inlawlawag ni Muntinlupa City Councilor Raul Corro, Chairman for Advocacy and Policy ti Union of Local Authorities of the Philippines a ti pannakaiyalud-od ti termino dagiti naelektaran a lokal nga opisyal ket makatulong tapno ad-adda a mapasayaat dati panagturay da gapu ta ti agdama a tallo a tawen a termino ti kada opisyal ket saan a makaumanay tapno maipatungpal da dagiti kalikagom da a programa ken proyekto.
Innayon na a ti limitado a termino dagiti local officials ket dakkel a karit ken lapped kadakuada tapno maipakita da ti abilidad da a mangidaulo iti masakupan da a lugar.
