LAOAG CITY – Maysa a grupo ti uppat nga umaayam idiay Texas ti nanggandat a makagun-od ti baro a Guinness World Record iti titulo a “Longest marathon playing pickleball (doubles)”
Ti team a maaw-awagan ti The Pickle Breakers a bukbuklen da Chong Kim, Jaret Petras, Laura Maala ken Geneva Olson ket nangrugi ti marathon session-da ti 6:00 ti bigat iti Pickler Universe iti Carrollton ken naglippas iti kabigatanna kalpasan ti 36 nga oras nga awan ti sarday a panagay-ayamda.
Ti dati a rekord ket 34 nga oras, 5 a minuto ken 55 a segundo a nairekord ti United Kingdom idi Septiembre 2024.
Insubmitiren ti grupo ti ebidensia ken manarimaan a maipadpadalan iti beripikasion ti Guinness World Records.
Ti pickleball ket maysa a raket sport a napagtipon a tennis, badminton ken ping-pong.
Ay-ayamen daytoy iti court a kadakkel ti badminton court, usar ti paddle a naaramid iti kayo wenno composite materials ken maysa a plastic ball nga adda ti buttawna.
Malaksid iti world record, nakaukkon pay ti grupo ti sumurok $18,000 para iti Taylor’s Gift Foundation, maysa a non-profit nga organisasion a tumultulong kadagiti pamilia nga agidonar ti organs kadgaiti pimmusayen a kabagianda.
Inbatad ni Mark Olson, asawa ni Geneva, personal ti makaigapu iti likud ti pannakipaset ti misisna iti proyekto. Malaksid iti suporta iti adbokasia ti Taylor’s Gift Foundation, gagem daytoy nga agserbi kas inspirasion iti uppat nga annakda a babbai.
Naammoan a ti The Pickle Breakers a bukbuklen da Chong Kim, Jaret Petras, Laura Maala ken Geneva Olson a nagay-ayam ti 36 nga oras a saan pulos a nagsarsardeng.
