LAOAG CITY – Inbatad ti Department of Social Welfare and Development (DSWD) a mabalinen nga usaren ti guarantee letters nga ipapaay ti ahensya tapno paggatang ti agas kadagiti napili a botika iti pagilian.
Inlawlawag ni Department of Social Welfare and Development Spokesperson Asst. Secretary Irene Dumlao a ti Guarantee Letter ket maysa a dokumento nga ipapaay ti ahensya para kadagiti benepisyaryo ti Assistance to Individuals in Crisis Situation (AICS) program nga agkasapulan ti tulong medikal.
Ti Guarantee Letter ket naka-address kadagiti service provider ti ahensya ken us-usaren kas garantiya iti serbisyo karaman dagiti agas a kasapulan.
Kabayatanna, para kadagiti indibidwal a dumaldalan iti krisis ken aggapo iti sabali a rehiyon, mabalin a makikoordinar wenno agturong iti Department of Social Welfare and Development Field Office iti lugar da tapno maamoan ti kumpleto a listaan dagiti botika nga gaaw-awat ti Guarantee Letter.
Ti Assistance to Individuals in Crisis Situation (AICS) program ket karaman iti social protection services ti Department of Social Welfare and Development a mangipapaay ti tulong para iti medical, burial, transportation, education, food, wenno financial assistance kadagiti indibidwal nga agpaspasar ti krisis iti biag, basar paylaeng iti assessment ti social worker.
