LAOAG CITY – Bimmisita ti Dubai-based sand artist a ni Mr. Nathaniel Alapide ditoy Ilocos Norte tapno iburay ti talento na iti san drawing.
Segun kenni Alapide, napili na ti Ilocos Norte gapo iti napintas a kalidad ti daga kangrunaan na iti sand dunes a pagdrawingan na.
Nagun-od ni Alapide ti Guinness World Record na idi 2022 kalpasan a nakaaramid ti world’s largest sand image no sadinno ti masterpiece ket addaan ti rukod a 23,000 square meters ken nagusar ti 12,000 tons iti darat a nagduduma ti kolor na idiay Dubai.
Inbatad na nga idi 2014 idi damo nga inaramid na ti sand drawing ken ti lola na ti nagbalin nga inspirasyon daytoy.
Kunana a tunggal agdrawing ket mapanunot na ti lola ken sakbay na a rugyan ket agusar ti drone tapno makita no kasano ti kalawa ti lokasyon.
Inlawlawag na a saan na a ninamnama a maaddaan ti rekord iti Guinness ken ibilang na a dream come true daytoy malaksid iti ragsak na a mangiburay iti talento na.
Idi kalman ket nag-drawing ti portrait ni Remedios Cuanang iti sangwanan ti Sitio Remedios Heritage Village.
Ni Alapide ket tubo iti Antipolo, ken ummuna a bimmisita ditoy Ilocos Norte idi 2017.
