LAOAG CITY – Inrakurak ti City Tourism Office ditoy ciudad ti Laoag a manarimaanen iti pannakaisayangkat ti Gumatang Kayon Food Trade Fair wenno Food exhibit.
Segun ken ni Atty. Charito Malicad, ti mangidadaulo iti City Tourism Office, ti Gumatang Kayon Food Trade Fair ket nangrugi paylaeng idi Abril 11 ken manamnama nga agoperar agingga intono Abril 20 (easter Sunday) iti Aurora Park.
Inbatad na a naestablisar ti Gumatang Kayon Food Trade Fair iti Aurora Park tapno adda ti pagtambayan, panganan ken pakaitampokan dagiti lokal a produkto ditoy ciudad ken iti Ilocos Norte.
Segun iti tourism officer, napintas daytoy a ganuat gapo ta ado dagiti mabalin a pasyaren iti centro ditoy ciudad ita a semana santa kas iti St. William Cathedral para kadagiti agbisita iglesia, sinking bell tower ken dadduma pay.
