(Update) LAOAG CITY – Masapul nga adda ti koordinasyon dagiti guwardiya dagiti bangko no siasinno dagiti pulis a nakaduty kadagiti asideg da karaman dagiti patrol car ken contact number ti hepe ti pulisya.
Segun ken ni P/C/Insp. Angelito de Juan, Hepe ti Investigation Section ti PNP Prov’l office, babaen iti daytoy ket adda ti asideg a pagkamangan da no kasapulan da ti tulong dagitoy.
Kuna pay ni de Juan a masapul a dagiti guwardiya ket am-ammo da wenno mailaangan da ti rupa dagiti kliyente ti bangko a pagpaayan da.
Malaksid iti daytoy, kinuna ti opisyal ket adda ti meeting nga iwaywayat da kadagiti mangidaulo dagiti guwardiya dagiti bangko a no sadinno a maipakita ken maaddaan da ti kopya dagiti ladawan dagiti addaanen ti record nga agtatakaw ti bangko tapno iti kasta ket irupaan da dagiti agbalin a kliyente dagitoy.
Inabatad ni de Juan a babaen iti daytoy ket maiapaayan ti seguridad dagiti guwardiya a napusgan a mangbangtay kadagitoy.
Mainaig iti daytoy, inbatad pay de Juan a kasapulan laeng ti panagalerto dagiti guwardiya kadagiti bangko no ikumpera kadagiti dadduma a guwardiya kadagiti establisiyamento.
Kuna na a maysa kadagiti obserbasyon da ket ti panagbalin a “multi -tasking” dagiti guwardiya kas iti panagited da ti numero kadagiti kliyente da a banag a saan koma gapu ta saan a paset ti trabaho da daytoy.
Inayon pay ni de Juan nga agdependen iti security agency no adda sabali a training nga ar-aramiden da kadagiti guwardiya malaksid iti training a dalanan da kas iti PNP.
Kuna na pay a regular ti inspection kadagiti guwardiya ken awan ti or-orasen na.
