LAOAG CITY – Binabalaw ti Hamas ti nagbalin a rakurak ni Israeli Prime Minister Benjamin Netanyahu a naan-anayen a sakupenda ti Gaza.
Basar iti Palestinian armed group, daytoy a rakurak ni Netanyahu ket nalawag a balbaliktadenna ti taray iti negosasion.
Kunana a daytoy nga addang ti Israel ket mangipasimudaag a nakasagana nga isakripisio daytoy ti biag ti agarup 30 pay nga hostage-da.
Nagpanawagan ti Hamas kadagiti Arab ken Islamic countries pakairamanan dagiti international community a kondenaren ken agkedked iti narisgo daytoy a plano ti Israel.
Madanagan ti United Nations ti nasao a rakurak ni Netanyahu gapu ta maisakripisio ti naruay a biag dagiti hostage a mangnamnama dagiti pamilia dagitoy a makasublida pay a sibibiag.
