LAOAG CITY – Maysa nga hamburger nga aramid ti maysa a restaurant idiay Netherlands ti nakagun-od ti world record gapu iti nangina a presio daytoy.
Kinumpirmaran ti records keeping organization a Guinness World Records a ti hamburger a naawagan kas ‘The Golden Boy’ ti agdama nga akin-iggem ti titulo a “Most Expensive Hamburger” gapu iti presiona a £4,295 wenno katukad ti P321,000.
Basar iti restaurant a nangaramid daytoy ti De Daltons, nabungon ti buns ti The Golden Boy ti edible gold leaf ken ti mismo a dough daytoy ket addaan ti Dom Perignon champagne.
Ti patty met daytoy ket naaramid kas Wagyu beef ken addaan ti garnish daytoy a caviar ken king crab. Addaan ti palaman nga onion rings a battered iti nabalor a champagne.
Kalpasan a makailako ti umuna nga order ti The Golden Boy, indonar ti De Daltons ti naglakoanna iti maysa a local food bank a nausar nga inpakanna kadagiti nakukurapay a residente idiay Voorthuizen, Gelderland, Netherlands.
