LAOAG CITY – Inbatad ni Barangay Chairman Donbert Agresor iti Barangay Lipay iti ili ti Vintar a naminpinsan a nadadael ti hanging bridge iti nasao a lugar.
Segun kenni Agresor, ti nasao a hanging bridge ket naperdi idi Bagyo Ompong ngem natarimaan da met laeng.
Nupay kasta, kuna ti kapitan a gapo iti Bagyo Ineng a dumaldalapos ita ditoy probinsya ket naminpinsanen a nadadael.
Kabayatanna, kinumpirmaran pay ni Agresor ti lugan ni Barangay Kagawad Arja Domingsil iti nasao met laeng a barangay ket naiyanod.
Kunana a saan nga inekspektar ni Domingsil nga umadalem ti nangiparkingan na iti lugan na agingga a naiyanod ken dimmanon iti Barangay Bago iti nasao met laeng nga ili.
