LAOAG CITY – Ginutigot ni dati nga house quad-committee chairman Robert Ace Barbers ni dati a presidential spokesperson Harry Roque nga agawiden iti pilipinas ken sangwen dagiti kaso na, kalpasan a na-deny ti asylum application na iti Austria.
Segun ken ni Barbers, masapol nga ikkaten ni Roque ti pammati a maysa daytoy a napateg a political figure nga agkasapulan ti proteksyon iti sabali a pagilian.
Inpetteng na nga awan ti sabali a rason ni Roque tapno agtultuloy a mangliklik kadagiti otoridad.
Maipalagip nga idi Setyembre 2024, indeklarar nga in contempt ti quad-committee ti 19th congress ni Roque kalpasan a maipagarop a napaay a nangisumitir kadagiti dokumento nga inkari na kadagiti panagdengngeg.
Naglikudan met ni Barbers ti panangiladawan ni Roque iti quad-committee kas maysa a “Kangaroo court,” ken inpaganetget na a naikkan ti gundaway a sungbatan na dagiti saludsud ti panel.
Maikonkonektar ni Roque iti imbestigasyon mainaig iti maipagarop nga human trafficking iti Lucky South 99 Offshore gaming hub iti Porac, Pampanga.
Naglikudan met ni Roque ti aniaman nga akusasyon kenkuana ken inpetteng na a politically motivated dagiti kaso kontra kenkuana.
Para ken ni Barbers, ti napateg ket agawid ni Roque ken sungbatan dagiti saludsud maipanggep ti maipagarop a pannakainaig na iti POGO.
