LAOAG CITY – Kinumpirmaran ti Hawaii Department of Health nga addan iti red zone ti Big Island, Hawaii gapu iti kellaat a panagngato ti kaso ti Covid-19 ken bilang dagiti matmatay.
Iti report ni Bombo International News Correspondent Manny Pascua iti Hawaii, agtultuloy a ngumatngato ti kaso ti Covid-19 iti isla.
Inbatad na nga iti Yukio Okutsu State Veterans Home a kaabay ti Hilo Medical Center ti nakairekord ti agarup 20 a baro a kaso ti coronavirus.
Gapu iti daytoy, kuna ni Pascua nga addan 46 a maay-aywanan a beterano iti nasao a Veteran Home ken 10 dagiti empleyado ti nagpositibo.
Mainaig iti daytoy, kaaduan nga agpapay iti nasao a Veteran Home ket Ilocano.
Inbatadna nga adda dagiti sumagmamano nga emleyado ti naipan iti hotel tapno saanda a maakaran ti pamilyada.
Kabayatanna, inpakaamo ni Pascua a 339 a baro a kaso ti covid-19 ti nairekord ti Hawaii idi kalpasan kalpasan a nairekord ti 35 iti Big Island, dua iti Maui ken 302 iti Honolulu.
Innayun na nga iti Honolulu ket adda ti libre a covid-19 testing ti maisaysayangkat iti maysa a tunnel iti kalsada nu sadino a pinondoan daytoy ti federal government.
