LAOAG CITY – Nadadael ti Noni Farm ti maysa nga Ilokano idiay Puna District, Big Island, Hawaii gapu iti agtultuloy a panagpuswak ken panagayus ti lava manipud iti Kilauea Volcano.
Daytoy ti inpakaammo ni Bombo International Correspondent Manny Pascua manipud iti nasao nga estado ti Amerika.
Binigbig ni Pascua ti akin kukua ti Noni Farm a ni Winjohn Estavillo, taga Brgy Badjo, iti ili ti Pinili ken agnanaed idiay Paradise Farm, Puna District.
Segun kenkuana, saan a masinunuo no manu ti balur dagiti nadadael.
Nupay kasta, kuna ni Pascua a saan nga sibubukel a farm ni Estavillo ti nadadael ngem ketdi kaaduan dagiti mula na nga Noni iti nadadael.
Inpakaammo na a mangnamnama ni Estavillo a tulungan ti US Department of Agricuture kalpasan a nadadael dagiti mula na a Noni.
Mainaig iti daytoy, kuna ni Pascua nga addaan ti lima nga acres wenno kaibatugan ti dua nga ektarya ti kalawa ti farm ni Estavillo.
Sabali manen a panagbettak ti Kilauea volcano ti naimaldit ti Hawaiian Volcano Observatory iti alas 12:55 iti parbangon ti Lunes idiay Hawaii.
Daytoy ti inpakaammo ni Bombo International Correspondent Manny Pascua.
Kuna na nga immabot ti 7 ribo a kadapan ti kangato iti dapo ken asok nga inpugso ti bulkan.
Segun kenni Pascua, naapektaran na ti Kau District a pagnanaedan dagiti adu a Pilipino.
Naamuan na a gapu iti agtultuloy a pannakalang-ab da iti asok ket adun dagiti Pilipino ti aguy-uyek ken agbubudo ti mata na.
