LAOAG CITY – Inlawlawag ni Sanggunian Bayan Member Amador Sadumiano iti ili ti Paoay ti pannakaipaay ti hazard pay dagiti regular ken job order iti nasao nga ili.
Inbatad na a babaen iti ordinansa a napagsasaritaan ti konseho ket aggapo iti personal services wenno savings a naggapo iti sweldo dagiti regular ti 500 a pisos nga hazard pay dagiti regular.
Kabayatanna, kuna na a ti hazard pay dagiti job orders a 250 ket naggapo iti Maintenance and Other Operating Expenses wenno MOOE.
Inbunannag na a gapu ta saan a makaanay ti pondo ket napagbalin a 250 ti naipaay kadagiti job orders tapno sapasap a makaawat dagitoy ti hazard pay.
Mainaig iti daytoy, inpakammo na a makikoordinar da iti Commission on Audit (COA) para iti kalikagom a manayunan ti hazard pay dagiti maseknan.
Immunan nga adda ti naipadanon iti Bombo Radyo a reklamo seknan iti nababba a hazard pay kadagiti job orders nu maikumpara kadagiti regular.
