LAOAG CITY – Napintas ti panagkammayet ti He Sha Prime Sand and Gravel Aggregates Philippines, Inc. ken ti gobierno probinsial ti Ilocos Norte iti pannakaipatungpal ti Corporate Social Responsibility ti kompania.
Daytoy ti pinasingkedan ni Ms. Katrina Belo, Community Relations Officer ti He Sha.
Segun kenkuana, malaksid iti “Operation Tuli” a naisayangkat iti Metro Lapaz ken iti Metro Gabu ken adun dagiti immuna a Corporate Social Responsibility ti kompaniada a naipatungpal ditoy probinsia kangrunaanna ditoy siudad ti Laoag.
Inbatadna nga agtultuloy a maipatpatungpal ti Corporate Social Responsibility ti kompania dagitoy agsipud iti napasnek a koordinasion ni Gob. Matthew Marcos Manotoc kadakuada.
Inlawlawagna a karaman kadagiti immunan a Corporate Social Responsibility ti He Sha a naipaay kadagiti umili ket ti “livelihood assistance, educational assistance, cash assistance pakairamanan ti pannakaibunong ti Payao kadagiti mangngalap manipud kadagiti naapektaran a barangay iti pannakaipatungpal ti nasao a proyekto.
Kunana nga iti agdama ket maisagsagana ti pannakaipasdek dagiti “sanitary toilet” iti Metro Lapaz ken Metro Gabu kas paset iti pannakidanggayda iti probinsia iti pannakatagiben ti “health and hygiene” ti komunidad.
Innayonna nga adda pay ti manamnama a maipaay a nayun a Corporate Social Responsibility para iti Metro Gabu ken Metro Lapaz ken amin dagitoy ket babaen iti koordinasion ti gobierno probinsial.
