LAOAG CITY – Naglikudan ni Mr. Amiel Sarmiento, Head Teacher III ti Suyo National High School iti ili a Dingras ti alegasyon kontra kenkuana seknan ti maipagarop a panangpungot na iti maysa nga estudyante.
Segun iti pannakisarita ti Bombo Radyo kenni Sarmiento, saan na a dinangran daytoy no diket pinidil na ti pingping iti saanen a nabigbig a Grade 10 nga estudyante nga ibilang na a pananglambing na laeng kenkuana.
Immuna iti daytoy, adda ti dimmanon ditoy Bombo Radyo a reklamo kontra kenni Sarmiento a mangibagbaga a pinungot-pungot na iti sangwanan dagiti ado nga estudyante.
Malaksid iti daytoy, nakalanad pay iti reklamo ti panagdanog ken panagparusok ti mangisursuro kadagiti agad-adal ken ti maipagarop a panagiggem na ti mabagbagi dagiti lalaki nga estudyante sakbay na nga arakupen.
Mainaig iti daytoy, kinumpirmaran dagiti kaklase ti ubing a pudno ti alegasyon kontra kenni Sarmiento ngem saan da nga ammo no anya ti rason.
Naamoan nga itay kallabes ket nagturong iti Rural Health Unit (RHU) ti ubing tapno dumawat ti medical certificate ken nagreklamo iti PNP-Dingras ken saanen a simrek iti pagadalan ti gapo ti maipagarop a bain na iti nasao a pasamak.
