LAOAG CITY – Nagballaag ni Police Chief Master Sergeant Eric Bumagat, ti mangidadaulo iti Philippine National Police (PNP) Traffic Division ditoy ciudad ti Laoag kadagiti tricycle drivers a nangina unay ti panagsingir da ti plete kadagiti pasahero da.
Inpalagip ni Bumagat a ti 11 a pisos ti regular fare idinto a 9 a pisos kadagiti estudyante ken senior citizen gapu ta adda ti 20 a porsiento a diswento dagitoy.
Immun-una iti daytoy, adda dagiti dua a tricycle drivers a naireklamo gapu ta 15 a pisos ti singir da kadagiti senior citizens.
Inpakaammo ni Bumagat a naipaayan dagiti nasao a tricycle drivers ti citation ticket gapu ta over-charging dagitoy.
Malaksid kadagitoy inbatad ni Bumagat nga adda pay ti sumagmamano a tricycle driver a naireklamo no sadinno nga amin dagitoy ket maipaayan ti citation ticket.
