LAOAG CITY – Inlawlawag ni Police Executive Master Sergeant Ferdinand Santos, ti mangidadaulo iti PNP Traffic Division ditoy ciudad ti Laoag no apay a saan a masursurot ti oras a pannakaipatungpal ti “No Left Turn Policy” iti junction a paset ti Barangay Nangalisan ditoy ciudad.
Naamoan a basar iti naipasa a resolusyon iti konseho ditoy ciudad ket mangrugi a maipatungpal ti No Left Turn iti oras ti alas-siete agingga iti alas-8:30 ti bigat ken iti alas-4:30 ti malem.
Inbatad ni Santos a ti nasapsapa a pannakaipatungpal ti No Left Turn ti makita da a solusyon tapno malapdan ken maalay-ayan ti nakaro a panagirot ti trapiko iti nasao a lugar.
Kuna na pay a no umadon ti behikulo iti junction agingga iti Gilbert Bridge ket maipatungpalen ti No Left Turn Policy.
Mainaig iti daytoy, inbatad ni Sang Panlungsod Member Edison Bonoan, ti chairman ti Committee on Transportation ditoy ciudad ti Laoag a discretion ti PNP-Traffic Division no ipatungpal da a nasapsapa ti No Left Turn Policy kangrunaan na ket saan pay a nalpas ti pandemya ken no daytoy ti makita da a solusyon tapno maliklikan ti panagirot ti trapiko iti nasao a lugar.
Namonganay daytoy a reaksyon da Santos ken Bonoan kalpasan nga adda dagiti nagreklamo ditoy Bombo Radyo Laoag mainaig iti saan nga agpapada nga oras a pannakaipatungpal ti No Left Turn Policy iti junction ditoy ciudad ti Laoag.
