LAOAG CITY – Inpakaammo ni Mr. Jhey-ar Mangati, ti Health Education ken Promotions Officer ti Mariano Marcos Memorial Hospital and Medical Center iti Siudad ti Batac a nangipatulod da ti sumagmamano nga health care workers iti naisayangkat a National Vaccination Drive idiay Pangasinan.
Segun kenkuana, dua a nurse, maysa a doktor ken maysa nga ambulance driver ti nagturong idiay Pangasinan tapno tumulong nga agbakuna kadagiti residente iti nasao a probinsya.
Inbatadna a boluntaryo a nangipatulod ni Dr. Ma. Lourdes Otayza, ti Medical Chief II ti nasao nga ospital kalpasan a naamoan da a ti Pangasinan ti kangatoan ti bilang a target a mabakunaan kontra iti COVID-19.
Kunana a gapu iti daytoy ket dagusda a nangipatulod ti augmentation manipod iti vaccination team ti ospital tapno makikaysa ken tumulong iti vaccination roll-out nangruna ket narway dagiti nagturong kadagiti vaccination site.
Inlawlawagna a tallo nga aldaw a nagtalinaed dagiti health care workers idiay Pangasinan tapno adda ti nayun a manpower dagiti medical workers ti Pangasinan a mangsango ken mangasikaso kadagiti tattao.
Innayonna nga immabot iti 240,999 ti bilang dagiti nabakunaan kontra iti COVID-19 idiay Pangasinan iti tallo nga aldaw a pannakaisayangkat ti National Vaccination Drive malaksid laeng ti 11,253 a nabakunaan met iti ciudad ti Dagupan iti nasao met laeng a probinsia.
Kabayatanna, nakasagana ti nadakamat nga ospital a tumulong kadagiti dadduma pay a probinsia.
