LAOAG CITY – Nagballaag dagiti health experts iti publiko nga awan ti kasiguradwan na nga ‘healthy’ ti vegetable chips wenno veggie chips a mailaklako iti merkado ken online.
Inbatad ni Health Justice Philippines managing director Ralph Degollacion nga adda dagiti content creators wenno social media influencers nga agiprom-promote kadagiti nasao a produkto ken ibidbida da kas maysa nga “healthy” ti veggie chips.
Kinanunungan met ni Health Philippines Alliance representative ken The Police Center Philippines board of trustee Ma. Fatima Villena ti nagbalin a posisyon ni Degollacion.
Inpetteng ni Villena a processed food latta ti produkto uraya maawagan pay daytoy kas “veggie.”
Basar iti dua nga health expert, napateg a maaddaan ti usto nga impormasyon ken maaddaan ti marketing regulations.
Inaramid ti Healthy Philippines Alliance ti panawagan da kabayatan ti panagpirma da ti Memorandum of Understanding (MOU) tapno labanan ti NCDs wenno non-communicable diseases, mainaig iti panagselebrar ti World Food Day idi kalman, Oktubre 16.
Nagpanawagan ti grupo iti gobierno a mangipatungpal kadagiti pagannurutan para iti panagikabil ti food warning labels tapno makissayan ti panagkonsumo kadagiti ultra-processed food ken labanan ti non-communicable diseases.
