LAOAG CITY – Inpakaammo ni Dr. Alan Taylan, ti St. Camillus De Lellis Hospital ditoy siudad ti Laoag a ti pertussis ket maysa a klase ti respiratory infection.
Segun kenkuana, mabalin a maiyakar ti nasao a sakit babaen iti panaguyek wenno katay a maiparsiak iti sabali a tao gapu iti mikrobio.
Inbatadna a nabayagen daytoy a klase ti mikrobio isu a masapol ti panagbakuna dagiti ubbing para iti naan-anay a proteksion dagitoy.
Kunana nga agpaot ti dua agingga uppat a lawas sakbay a marikna ti maysa nga indibidual ti nasao a sakit no sadino mabalin pay a marikna daytoy kalpasan ti walo a lawas.
Mainaig iti daytoy, kuna ni Dr. Taylan tapno saan a kumaro ti pannakapasar ti pertussis ket nasaysayaat nga agpabakuna dagiti ubbing a nasapsapa tapno maliklikan a makaptan ti nadakamat a sakit.
Ginutigotna nga agusar ti facemask tapno masalakniban ti salun-at ken saan a kumaro ti sintomas a mabalin a mapasaran ti maysa nga indibidual.
Innayonna a masapol ti insigida a panagpakonsultar kadagiti doktor tapno maammoan a dagus ti kasapulan a rumbeng nga aramiden ti maysa a pasiente.
Immuna iti daytoy, ginutigot ti Department of Health (DOH) ti publiko nga agpabakuna kalpasan ti kellaat a panagngato ti bilang dagiti mairekrekord a kaso ti pertussis wenno uyek ken measles wenno kamuras iti pagilian.
