LAOAG CITY – Inlawlawag ni Dr. Alan Taylan, ti St. Camillus De Lellis Hospital ditoy siudad ti Laoag seknan iti double pneumonia a mapaspasaran ni Pope Francis iti agdama.
Segun kenkuana, ti pneumonia ket maysa nga inpeksion ti bara ti maysa a tao a mangitunda ti pannakaperdi iti daytoy.
Inbatadna nga addaan daytoy ti nagduduma a mikrobio kas ti bacteria, virus wenno fungal.
Kunana a narisrisgo ti biag ti maysa nga indibidual no maapektaran ti dua a bara gubuay iti double pneumonia.
Mainaig iti daytoy, inpakaammo ni Dr. Taylan a dagiti sintomas ti double pneumonia ket panagsagaba ti marigatan ti umanges, nasakit ti barukong, aggurigor, aguyek, agtegerger, napaspas ti pitik ti puso, napaspas ti panaganges, alisto mabannog ken ag-vomit.
Innayonna a manmano laeng ti agsagsagaba ti double pneumonia gapu ta ti kaaduan ket maysa laeng a bara ti maapektaran.
Kabayatanna, basar iti datos ti Philippine Statistics Authority a ti pneumonia ket maikapat a rason ti pannakatay dagiti Pilipino.
