LAOAG CITY – Naitaray iti ospital ni PNP chief Gen. Archie Francisco Gamboa ken innem pay a kakadwa kalpasan a nagswek ti nagluganan da a chopper idiay Laguna.
Segun iti PNP, adda iti natalged a kasasaad ni Gamboa ken sumagmamano a nakalugan a PNP generals ken naipan da iti kaasitgan nga ospital.
►PNP Chief Gamboa ken dagiti kakadua na a naglugan ti nagsuwek a chopper idiay Laguna, naipaagas idiay Asian Hospital
Kadwa ni Gamboa iti chopper da Lt Gen Jovic Ramos, Lt Gen Magaway ken PNP spokesperson Brig. Gen. Bernard Banac.
Iti impormasyon, naisab-it ti rotor blade ti chopper iti live wire ti Meralco kabayatan a nagho-hover wenno ag-take off ti chopper gapu iti dust zero visibility a nangitunda ti nagswekan na.
Gapu iti napasamak nga aksidente ket nagsina ti rotor blades.
Makita pay iti ladawan a nawarwara ti sumagmamano a paset ti helicopter.
Naamoan a pumanawen ti chopper ni Gamboa iti Laperal Compound iti San Pedro ken agturong koma iti Camp Vicente Lim para iti command visit iti PRO-4A idi napasamak ti insidente.
Dagus met a nagresponde iti crash site dagiti firefighters.
