LAOAG CITY – Agtultuloy ti panangbirbiruk dagiti otoridad iti maysa nga helicopter a nagluganan ti tallo nga indibidual kalpasan a nagpukaw iti asideg ti Mount Aso, maysa kadagiti kaatiboan a bulkan idiay Japan.
Pimmanaw ti helicopter iti zoo iti Aso City para iti 10-minute tour ngem saanen a nakasubli pay.
Adda ti nakita a banag nga arigna kapada ti aircraft iti uneg ti wangawangan ti Nakadake, maysa kadagiti 5 peak ti Mt. Aso ngem saan pay a makumpirmaran dagiti otoridad no daytoy ti mapukpukaw nga helicopter.
Ti nasao nga helicopter ket pinatayab ti agtawen ti 64 a beterano a piloto ken addaanen ti 40 a tawen nga experience idinto a ti pasahero na ket maysa a lalaki ken babai nga agpada a Taiwanese.
Naamoan a ti aircraft nga US-made Robinson R44, ket isu ti maikatlo a panagbiyahe na iti dayta nga aldaw sakbay a nagpukaw.
Inpasigurado ti Tukumi Enterprise, ti operator ti helicopter nga awan ti nagbalin nga isyu iti dua nga immuna a biyahe ti nagpukaw nga helicopter.
Gapu iti napasamak, sinuspenso paylaeng ti Takumi Enterprise ti operasyon ti amin nga helicopter da.
Maipalagip a ti naudi a panagbettak ti Mount Aso ket idi Oktubre 2021.
