LAOAG CITY – Inyistorya ni Mrs. Gemalyn Respicio iti Barangay Nagsurot iti ili ti Burgos no kasano ti panangdangran kenkuana ti mismo nga asawa na a ni Jayson Respicio, helper wenno caretaker iti pagtaengan ni Vice Mayor Marlon Valdez iti ili ti San Nicolas.
Segun kenni Mrs. Respicio, bayat nga adda ti asawa na iti pagtaengan ti bise mayor iti Barangay San Pablo iti ili ti San Nicolas ket inbaga na a mapan isuna ken makikuyog a mapan idiay Manila.
Inbatad na nga idi nakadanon ket nasayaat pay laeng ti panagsarsarita da ngem kalpasan ti sumagmamano a minutos ket saanen a makatalna ti lalaki ken idi nakaturogen ti biktima a nakapakleb ket maipagarop a pinang-or ti asawa na ti ulo na iti saan na a masinunuo a banag.
Gapo iti daytoy, dagus a bimmangon ngem maipagarop nga inbungon ni Jayson ti twalya ken ules iti biktima ken intuloy na a minalmalo ti ulo na, indugsol na iti surok ken buksit ti nasao a banag ken nairaman a nadangran ti teltel ken takyag na.
Inlawlawag na a ti napanunot na kadagitoy a gundaway ket matay isuna rason a pinilit na a ginammatan ti maselan a parte ti bagi ti asawa na isut gapo na a nagsardeng a nangmalmalo ti lalaki, kalpasan ti inarakop na daytoy ken kiansarita na ti nasayaat agingga a nalawlawagan ti lalaki.
Inbaga na a binaon na pay a napan gimmatang ti agas ti asawa na ngem maipagarop nga inbaga manen ti lalaki nga amangan ket agipulong iti pulis ti babai ngem inay-ayo na latta daytoy.
Naamoan a ti naibaga ni Jayson kenni Gemmalyn ket nauman a maibalbalod, ken kunana a datin a makabkabil daytoy babaen met laeng iti asawa na.
Mainaig iti daytoy, kuna ni Gemmalyn a nagpatulong isuna iti karruba da Vice Mayor Valdez ken naipan daytoy iti health center.
Nupay kasta, kunana a bayat a madadait ti ulo na ket napan ti bise mayor ken kinita na ti sugat na, ken ditoy a nagsao ti madi a sarita ken insawang na a saanen a mapmapan ti babai iti balay da ti opisyal ken pinapanaw na pay dagiti nangkuyog kenkuana iti nasao a center.
Naamoan pay manipud kenni Gemmalyn a saan nga ammo ti Bise Mayor nga adda isuna iti balay da gapo ta saan nga inbagbaga ni Jayson a makikuyog isuna a mapan idiay Metro Manila.
Kabayatanna, naamoan laeng ni Gemmalyn a nakapagpyansa ti asawa na idi timmawag iti PNP-San Nicolas tapno saludsoden no kaano a maawat na ti summon manipud iti korte ken inrapin na a kinumusta ti asawa na.
Inpasingked met ni Gemmalyn a saan nan a sublyanan ti asawa na gapo iti maipagarop a panangkabkabil na kenkuana.
