(Update)LAOAG CITY – Pimmusay gapu iti Hemorrhagic Shock Secondary to Multiple Stab Wounds ni Elizabeth Villanueva y Gan, agtawen ti 24, addaan ti live in partner ken residente ti Brgy. Ngabangab, Pasuquin, Ilocos Norte.
Daytoy ti inisyal a duktal ni P/Supt. Nerino B. Daciego, Regional Medico Legal Officer ti Regional Crime Laboratory iti Region1 kalpasan ti inyusuat na nga autoipsy ti bangkay ti biktima iti sementeryo ti simbaan Romano Katoliko iti Bgy. Davila iti nasao nga ili.
Naiyusuat ti nasao nga addang baben ti pammalubos ti ama na a ni Efren Villanueva.
Maipalagip a nabirukan ti bangkay ni Vilanueva iti kabakiran a paset ti Bantay Banayoyo, Bgy. 27 Sulbec iti nasao met la nga ili idi Marso 25 a naruay dagiti sinagaba na a bagkong iti nagduduma a paset ti bagi na ken agropropsan.
