LAOAG CITY – Inpasingked ni Police Major Rommel Ramos, ti Chief of Police iti ili ti Bacarra a saanda a pinilit a sumuko iti Bureau of Correction (BuCor) ti dati a balud a ni Joel Domingo nga addaan ti kaso a “double murder”.
Inlawlawag ni Ramos a boluntaryo a nagturong ni Domingo iti opisina da bitbit na dagiti dokumento na tapno dumawat ti clearance a legal ti pannakawayawaya na.
Daytoy ket kalpasan nga inbilin ni Presidente Rodrigo Duterte a sumuko dagiti dati a balud a nawayawayaan gapu iti Good Conduct Time Allowance (GCTA) Law.
Inbatad ni Ramos nga idi inberipikar da ti nagan ni Domingo ket nakita da a karaman daytoy iti listaan ti BuCor isut gapuna nga inbiyahe da daytoy kas panangtungpal da ti pammilin ti presidente.
Innayon na a nupay adda dagiti dokumento nga ipakpakita ni Domingo ket saan a kaskari na a mapalubusan daytoy nga agsubli ditoy probinsya.
Kuna pay ni Ramos a nasurok a sangaribo dagiti boluntaryo a simmuko a dati a balud ket masapol a masaggaysa dagitoy a maiberipikar ti nagan da.
Kinumpirmaran pay ni Ramos a sakbay ken ni DOmingo ket adda pay ti immuna a nagboluntaryo a simmuko kadakuda ngem awan ti nagan na iti listaan ti BuCor isut gapuna a saandan nga intugot idiay Manila.
Maipalagip nga indanun iti Bombo Radyo Laoag ni Domingo a pinilit da daytoy a napan idiay New Bilibid Prison iti baet nga adda dagiti inpakita na a dokumento na.
