LAOAG CITY – Nangipila ti resolusyon ni Sang. Bayan Member Marvin Pascua, Chairman ti committee on peace and order iti ili ti Solsona a masapol a mamandar dagiti barangay tanod nga agronda iti rinabii gapu iti masansan a panagtakaw ti irik a mapaspasamak iti ili ti Solsona.
Segun ken ni Pascua, dakkel ti maitulong dagiti barangay tanod tapno no kasta ket saanen a maulit pay ti napasamak sipod ta saan laeng a naminsan a napasamak ti panagtakaw iti irik iti nadakamat nga ili.
Kinumpirmaran na a sakbay pay ti panagtakaw iti Brgy. Nagpatpatan iti nasao nga ili no sadinno a natakaw dagiti 12 a sako nga irik ket adda pay naireport a panagtakaw iti irik iti Barangay Barcelona, Barangay Puttao, Barangay Catangraran, Barangay Nagpatpatan, Barangay Santiago.
Kuna ni Pascua a kinasarita na pay ti Philippine National Police iti ili ti Solsona a mangiyuswat da pay ti masansan a ronda ken monitor iti aglawlaw iti rinabii tapno saanen a maulit pay ti kastoy a panagtakaw.
Imbatadna nga inmannamong met dagiti pada na a miembro ti Sang. Bayan iti daytoy a resolusyon.
Inpettengna a manamnama ti naan-anay a panagimbestigarda maipapan ti kinasiasino dagiti nagtakaw iti ili ti Solsona.
Kabayatanna, inlawlawag na a mabalin a sumango iti kaso a theft dagiti maduktalan a nagtakaw, bayat a dagiti aggatang iti aniaman a natakaw ket mabalin a sumango iti violation of anti-fencing law.
