LAOAG CITY – Inlawlawag ni Police Captain Johnveil Maramag, chief of police ti PNP-Marcos nga awan ti kinapudno na ti impormasyon a naka-lockdown ti MHO iti nasao nga ili.
Daytoy ket kalpasan nga adda ti dimmanon nga impormasyon ditoy Bombo Radyo a naka-lockdown iti agdama ti nadakamat a pasilidad.
Segun kenni Maramag, adda ti maysa a Locally Stranded Individual nga agawid kuma ditoy ciudad ti Laoag ngem gapo ta awan ti pagtalinaedan na a quarantine facility ket nabagaan nga agbirok ti kabagyan na nga isu ti pagturungan na pay laeng nga ili.
Naamoan nga adda ti kabagyan na iti ili ti Marcos ken inawat met daytoy ti lokal a gobierno.
Ummuna iti daytoy, negatibo iti antigen test ti nasao nga LSI iti border control iti ili ti Badoc ngem kas protocol ket dimmalan manen iti antigen test iti ili ti Marcos ken ditoy a nagpositibo.
Gapo iti daytoy, dimmalan met iti swab test dagiti nasurok lima nga empleado ti MHO-Marcos nga isu ti nangsukon iti LSI iti border control iti ili ti Badoc ken negatibo ti resulta ti test da idinto a ti maseknan nga LSI ket maiyur-uray pay laeng ti resulta ti RT-PCR test na.
Saan met a makumpirmaran ni Maramag no intuloy dagiti nasao nga empleado ti 14-day quarantine na.
Inpasigurado na pay a saan nga apektado ti operasyon ti MHO iti ili ti Marcos.
Kabayatanna, kuna ni Mayor Antonio Mariano iti nasao nga ili nga idi laeng rabii a nalukatan ti MHO kalpasan a negatibo ti resulta ti swab test dagiti empleado.
Innayon ti mayor a pudno a nag-lockdown ti MHO ngem saan a masigurado ti biang ti Bombo Radyo no mano nga aldaw.
