LAOAG CITY – Kalikagum ni P/Lt.Col. Ryan Retotar, Hepe ti Laoag City Police Station a maammoan no asino dagiti dua a pulis a nagpatulungan ni Sangguniang Panlungsod Member Jason Perera a mangminihir ti trapiko ngem timmalawda.
Segun kenkuana, babaen iti daytoy ket maimbestigaran dagiti nasao a pulis tapno mailawlawag a naimbag no ania ti sibubukel a napasamak kadayta a gundaway ken maipatungpal ti maiyannatop a tignay.
Inbatadna a mabalin a tumulong dagiti kameng ti kapulisan no makitada a nairot ti taray ti trapiko tapno maalay-ayan ti panagdudupudop dagiti dumaldalyasat a motorista.
Inlawlawagna nga umdas dagiti nai-deploy a traffic enforcers pakairamanan dagiti adda iti Philippine National Police – Traffic Division tapno maipasigurado nga awan ti tumaod a problema iti kangitingitan ti kinairot ti trapiko.
Maipalagip nga inmanihir ni Konsehal Perera ti trapiko iti paset ti Rizal Street ditoy siudad ti Laoag kalpasan a naobserbaranna nga awan ti agpabigay kadagiti motorista iti paset ti Bacarra Road a nangitunda ti nair-irot a taray ti trapiko.
Immuna iti daytoy, nagkiddaw pay ni Perera kadagiti dua a pulis tapno tumulong iti panangimanihir iti taray ti trapiko ngem apaman a nagsubli daytoy iti kalsada ket awanen dagiti pulis a nangitunda ti in-inot manen a nagsubli iti kinairot ti taray ti trapiko isut gapuna a nagsubli manen ni Perera iti kalsada tapno imanihir iti taray ti trapiko.
