LAOAG CITY – Naglikudan ni Police Captain Reycar Almazan, ti Hepe iti Philippine National Police iti ili ti Sarrat ti alegasion a maipagarup nga agpabpabayadda kasukat ti saanda a panangtiliw kadagiti agsusugal iti minatayan.
Daytoy ti inpettengna kalpasan nga adda ti dimmanon nga impormasion ditoy Bombo Radyo Laoag maipapan iti maipagarup a panagturong dagiti dadduma a kameng iti Philippine National Police iti ili ti Sarrat tapno agkolektar ti bayad ken maipagarup nga adda pay ti maited kenkuana.
Segun ken ni Police Captain Almazan nga awan ti kinapudnona daytoy nga alegasion kadakuada gapu ta naiget a maipatpatungpal ti pannakaipawil ti panagsugal iti lugarda.
Inbatadna nga iti kallabes ket adda ti natiliwda nga agsusugal iti maysa a minatayan iti Brgy. 16 iti nasao nga ili.
Inlawlawagna a daytoy a reklamo ket maysa a wagas a pammerdi laeng kadakuada gapu iti panangtiliw kadagiti aglablabsing iti pagalagadan.
Mainaig iti daytoy, inpakaammo ni Mayor Remigio Medrano iti ili ti Sarrat nga adda ti maaw-awatna a text messages maipanggep iti kapada a reklamo a naipadanon ditoy Bombo Radyo Laoag.
Inbatadna nga apaman a naawatna dagitoy ket insigida a pinaayabanna dagiti Barangay Officials iti maseknan a Barangay tapno mangiwayat ti imbestigasion no sadino nga awan ti nakitada iti lugar.
Innayonna nga awan pay ti nakasarsaritana kadagiti kameng ti Philippine National Police iti ili ti Sarrat nangruna iti Hepe ti nasao a kuerpo ti pulisia gapu ta kalikagumna a mangiwayat ti silent investigation maipapan iti daytoy a banag.
