LAOAG CITY – Nagbalin a makumikom ni Hidilyn Diaz-Naranjo iti panangitandudo iti sports a weightlifting ngem saan a malipatan ti umuna nga Olympic champion ti pagilian ti 2028 Games idiay Los Angeles.
Awan ti plano ti 2020 Tokyo Olympics weightlifting gold medalist a sumabak iti Southeast Asian Games ita a tawen idiay Bangkok, Thailand pakairamanan ti Asian Games inton sumaruno a tawen idiay Nagoya, Japan.
Inlawlawagna nga agplanplanodan ti asawana a ni Julius Naranjo a maaddaan ti umuna nga anak sakbay ti Olympic qualifiers a temporario a mangrugi iti maudi a paset inton sumaruno a tawen.
Naammoan a mabalin a daytoyen ti maudi a pannakipasetna iti global quadrennial Summer Games.
