LAOAG CITY – Maysa nga higante a thumbtack nga adda ti kangatona a 21 feet ken 7 inches ti nabirngasan kas kadakkelan a push pin iti intero a lubong ti Guinness World Records.
Ti Transit Authority of Central Kentucky (TACK) ti nangirugi ti proyekto kas paset ti renovation ti headquarter office-da idiay Elizabethtown, Kentucky.
Inbatad ni Glenn Arney, Executive Director ken Chief Executive Officer ti Transit Authority of Central Kentucky, isuda mismo ti nangaramid ti higante a thumbtack.
Gapu ta nangina ti quote ti maysa a kompania idiay Florida nga agbalor ti $109,000, nagdesision ni Arney ken tallo nga empleado nga ag-DIY wenno Do It Yourself isuda nupay awan ti kapadasanda iti panag-welding.
Ti maysa iti grupoda ket nakasursuro ti welding babaen iti panagbuyana iti online.
Nabukel ti thumbtack nga agdagsen ti 3,000 lbs ken limmabes daytoy iti 19 feet ken 8 inches minimum requirement ti Guinness tapno maipaima kadakuada ti rekord.
Naammoan a ti thumbtack ket nagserbi kas baro a simbolo para iti Transit Authority of Central Kentucky ken iti komunidad ti Elizabethtown.
