LAOAG CITY – Natiliw ti maysa a grade 12 student nga agtawen ti 20 babaen ti anti-illegal drug buy bust operation iti Brgy. 7-B Nuestra Seniora de Natividad ditoy siudad ti Laoag.
Nabigbig ti suspek a ni Rolfbert Diaz ken resident iti Brgy. 12, Sta Filomena II, iti ili ti Bacarra.
Iti naiyuswat nga operasyon dagiti otoridad, nga indauloan ti PDEU, babaen iti koordinasyon ti PNP Laoag, PIU-INPPO,RPDEU-1 ken ti PDEA-INPO, ket nagballaigi ti operasyon kalpasan a naglako ti suspek iti maysa a sachet a naglaon ti maipagarup a napagango a bulong ti marijuana iti nagpammarang a gumatang a kameng ti pulisya.
Narekobre dagiti otoridad ti 500 a pisos a buy bust money 150 a pisos a personal a kuarta ken maysa a cellphone.
Naamuan a maibilang ti suspek a High Value Individual ken Top 10 iti Regional Priority List ti Police Regional Office 1 (PRO1).
Nagtalinaed ti suspek iti kustudyar ti PNP bayat a maisagsagana ti reklamo a maipila seknan iti panaglabsing iti RA 9165 wenno Comprehensive Dangerous Drugs Act of 2002.
