Inpakdaar ti Department of Health (DOH) a mabalin a madoble ti bilang dagiti apektado iti Human Immunodeficiency Virus (HIV)/ Acquired Immunodeficiency Syndrome (AIDS) ditoy pagilian inton sumaruno a sumagmamano a tawen.
Segun iti datos ti gobierno agingga idi Marso 2024 ket addaan ti 129,772 a na-diagnose a kaso ti nadakamat a sakit a dandani kagudua kadagitoy ket agtutubo nga agtawen iti 15 agingga 24 ditoy pagilian.
Kaaduan kadagiti baro a kaso ket naggapu iti National Capital Region, a sinaruno ti Region III, IV-A, VI, KEN VII.
Innayon pay ti Department of Health a no agtultuloy daytoy ket agparang manipud iti projection a mabalin a dumanon iti 401,700 ti bilang dagiti kaso iti pagilian inton tawen 2030 manipud iti pattapatta 215,400 ita a tawen.
Kabayatanna, kinuna ni Health Secretary Teodoro Herbosa a malapdan daytoy babaen ti panangitandudo iti safe sex, nasaysayaat a health literacy a maiaayon iti kultura ken panagsukimat iti HIV kas paset ti primary care.
