LAOAG CITY – Inbatad ni Police Capt. Joseph Tayaban, ti chief of police iti ili ti Badoc nga agtultuloy ti imbestigasyon da iti maipagarop a napasamak a panagholdup iti paset ti Barangay Caraitan ti nasao nga ili.
Immuna iti daytoy, inbatad ni Tayaban a napan nagreport ni Deward Ines y Yabes, 40, naasawaan, aggatgatang ti baboy ken residente ti Brgy. Ballaigui, Sinait, Ilocos Sur a maipagarop nga hinoldup dagiti saanna a nabigbig a lallaki iti parbangon idi kalman.
Inbatad na nga iti palawag ni Ines, kabayatan ti panagdaldalyasat na iti lugar a nakalugan ti kurung-kurung na ket adda ti dua a lallaki a nakalugan ti motorsiklo a nangpasardeng kenkuana ken tinutukan da ti paltog.
Iti panangisardeng ni Ines ti lugan na ket ditoy nga innala da ti iggem na a kwarta nga umabot ti P43,140.00.
Inlawlawag ni Tayaban a kas paset ti panagimbestigar da ket inrebisar da dagiti CCTV camera a naimuntar iti lugar ken nagdamdamag da kadagiti opisyal ti barangay ket ditoy a naamoan da nga awan ti napasamak a panagholdup iti lugar.
Innayon na nga iti oras nga inbaga ni Ines a pannakaholdup na ket isu met ti papan panagronda dagiti barangay tanud iti lugar ngem awan ti nakita da a kastoy a pasamak.
Kuna pay ni Tayaban nga iti papanda panagimbestigar iti lugar ni Ines ket naduktalan da nga addan ti rekord na.
Nupay kasta, inbatad ni Tayaban nga itultuloy da latta ti agimbestigar mainaig iti daytoy a pasamak.
