LAOAG CITY – Naelektaran kas baro a Presidente ti Liga ng mga Barangay ditoy Ilocos Norte ni Hon. Ryan John Pascua manipod iti ili ti Pinili.
Daytoy ket kalpasan a sangsangkamaysa a binutusan isuna dagiti padana nga ABC President ditoy probinsia malaksid ken ni Hon. Melcon Saguid gapu ta absent daytoy idi naiyuswat ti panagbubutos.
Inbatad ni Pascua nga iti laksid nga awan ti nagkamanganna a nangato nga opisial ti gobierno para iti naan-anay a suporta kenkuana iti eleksion ket pinili daytoy ti kaadduan gapu ta mamati a babaen iti inpakitana a serbisio kadagiti umili ket isu ti nagbalin a wagas tapno mapagtalkan ken maikkan ti gundaway nga agserbi kadagiti kailian.
Naammoan a ni Pascua ket nakagun-od ti 22 a butos iti Provincial Liga ng mga Barangay Elections no sadino nga inorganisar ti Department of the Interior and Local Government – Ilocos Norte nga idadauloan ni Atty. Gerald Gallardo, Local Government Operations Officer VII.
Mainaig iti daytoy, naelektaran ni Hon. Felix Aguinaldo, Jr. iti ili ti Pasuquin kas Vice President, Hon. Evelyn Imelda Dancel iti ili ti Banna kas Auditor idinto dagiti naelektaran kas Board of Directors ket dagiti sumaganad Hon. Virgilio Calajate iti ili ti Badoc, Hon. Nelson Gooc iti ili ti Paoay, Hon. Gilbert Medina iti siudad ti Batac, Hon. Roque Benjamin Ablan iti siudad ti Laoag, Hon. Lendell Benedict Chua iti ili ti Piddig, Hon. Melcon Saguid iti ili ti Dingras, Hon. Derek Velasco iti ili ti Baccara, Hon. Rolando Boque iti ili ti Vintar.
Kabayatanna, manamanama nga agsapata dagiti maseknan nga opisial a naelektaran iti Provincial Liga ng mga Barangay Elections inton sumaruno a lawas babaen ken ni Gob. Matthew Marcos Manotoc.
