LAOAG CITY – Ngimmato ti honorarium dagiti agserbi nga Electoral Board Members para iti mapaspasangasangan a 2025 National and Local Elections.
Daytoy ti inpakaammo ni Atty. Julius Balbas, Election Officer ditoy siudad ti Laoag.
Segun ken ni Balbas, dakkel ti nagngatoan ti honorarium dagiti agserbi kas Electoral Board Members inton eleksion.
Inbatadna a ti Electoral Board Chairperson ket dumanon Iti 12 a ribu a pisos ti honorarium-da idinto a ti Electoral Board Members ken precinct workers ket dumanon iti 8 agingga 11 a ribu a pisos ken lima nga aldaw a leave credit.
Malaksid iti daytoy, inlawlawag ni Atty. Balbas nga adda pay ti insurance dagitoy a 500 a ribu a pisos no bilang man adda ti mapasamak kadakuada iti kangitingitan ti eleksion.
Kunana nga adda ti maisayangkat a panagsanay dagiti mangisursuro idiay Metro Manila inton Marso 3 agingga 21.
Maipalagip a daytoy ti maysa a nagbalin a lungalong ni Commission on Elections Chairperson George Garcia iti Kongreso a maipangato ti honoraruim dagiti maseknan gapu ta saan a nalaka ti trabahoda.
