LAOAG CITY – Kalikagum ti Sangguniang Panlungsod a manayonan ti honorarium dagiti barangay tanod ditoy siudad ti Laoag.
Daytoy ket iti babaen ti Draft City Ordinance No. SP-2025 -001 wenno maysa nga ordinansa a mangipaay ti nayon a benepisio ken insentibo iti Bantay Bayan Member wenno barangay tanod.
Segun iti Chairman ti Committee on Social Welfare and Development and Public Service, dagiti barangay tanod ket maysa kadagiti agsaksakripisio tapno mapagtalinaed ti linak, urnos ken talna iti uneg ti barangay.
Inbatadna a maibasar iti umuna a committee meeting ti Presidente dagiti barangay tanod kadagiti amin a 80 a barangay ditoy siudad ket naammoan nga iti agdama nga honorarium-da ket dumanon iti maysa agingga dua a ribu iti kada bulan.
Inlawlawagna a daytoy a gatad ket saan nga umanay no idasig iti trabaho ken serbisio nga ipapaayda iti barangay ken dadduma pay.
Kunana a no bilang a maaprobaran daytoy nga ordinansa ket masapol ti requirements dagiti barangay tanod kas ti panangipakitada ti accomplishment report.
Naammoan a ti sumaruno a pannakatratarna daytoy nga ordinansa ket mailanad no mano ti mainayon nga honorarium nga awaten dagiti barangay tanod ditoy siudad ti Laoag.
Kabayatanna, naipasa ti nasao nga ordinansa iti maikadua a pannakaibasana iti Sangguniang Panlungsod.
