LAOAG CITY – Naawaten dagiti opisyales ti Brgy. Navotas-B ditoy ciudad ti Laoag ti honorarium da ti makatawen nga umabot iti nasurok a 50 ribo a pisos kalpasan a nagresign ni dati a secretary Irene Tomas.
Segun kenni Mrs. Janette Duarte, Local Government Operations Officer ditoy ciudad, insigida nga inproseso ti baro a sekretaryo dagiti kasapulan a dokumento babaen ti tulong ti Department of Interior and Local Government (DILG) tapnu maala dagiti Brgy. Officials ti honorarium da.
Ti baro a sekretaryo ti nadakamat a barangay a ni Mark Domingo ket immuna a nagserbi kas administrative aide rason a saan a narigatan a nangileppas kadagiti kasapulan dagiti maseknan a dokumento.
Naamoan a sipud nagtugaw ni Domingo kas sekretaryo ti nadakamat a barangay ket nasapan a malpas dagiti dokumento a maipasa iti opisina ti Department of Interior and Local Government. Maipalagip nga immunan a naipadanun ti Bombo Radyo Laoag a makatawenen a saan a nakaawat ti honorarium dagit opisyal ti nadakamat a barangay gapu ta saan nga ikaskaso ti dati a sekretaryo dagiti kasapulan da a dokumento.
