LAOAG CITY – Naipasa iti maikadwa a pannakaibasa iti Draft City Ordinance Sang Panglungsod-2023-081 wenno ti hospital revenue code ti Laoag City General Hospital ditoy ciudad ti Laoag.
Segun ken ni Konsehal Jason Perera, naipababa ti bayad dagiti nagduduma a serbisyo iti nasao nga ospital.
Immunan a naangay ti committee hearing no sadinno nga ado dagiti nabaliwan kas iti bayad ti ambulansya, bayad ti kada kwarto iti ospital, toll gate fee no agturong iti ruwar iti probinsia ken dadduma pay.
Maipalagip a kwinestyunaran ni Perera ti kinangina ti bayad ti ambulansya nga umabot iti 15 ribo a pisos no adda ti agpaitulod a pasyente idiay Metro Manila.
Kinumpirmaran pay ni Dr. Marsha Lou Wafan, ti mangidadaulo iti Laoag City General Hospital a saan pay a karaman ti bayad ti toll gate, driver, ken pannakamentenar ti ambulansya iti 15 a ribo a pisos.
