LAOAG CITY – Inadmitir ti hostile witness a ni Office of the Vice President (OVP) special disbursing officer (SDO) Gina Acosta a saanna a malagip ti alokasyon para iti confidential fund iti Davao City idi mayor paylaeng ni Vice President Sara Duterte manipod 2019 agingga iti 2022 nga agbalor ti P140 million iti kada tawen wenno agarop P2 billion iti pakabuklan.
Inrakurak daytoy ni Acosta kalpasan a sinaludsud ti counsel for prosecution a ni Atty. Amando Ligutan mainaig ti alokasyon para iti confidential funds iti Davao iti maika-17 nga aldaw ti impeachment trial ni VP Duterte ita ng aldaw ti Lunes, Agosto 24.
Maipalagip a ni Acosta ket nagserbi kas special disbursing officer para iti confidential funds ni Duterte idi daytoy paylaeng ti mayor iti Davao manipod 2019 agingga iti 2022.
Iti direct examination, sinaludsud ni Atty. Ligutan ni Acosta no nakaawat ti Davao City ti P460 milyon a confidential funds idi 2019, a sinungbatan met ni Acosta a saanna a malagip.
Iti pannakasaludsud no mano ti naiyalokar iti Davao City, inpetteng ni Acosta a saanna a malagip gapu ta nabayagen ti nasao nga alokasyon ken gapu metlaeng iti tawen na.
Inpresentar met ni Ligutan ti maysa a graphic a mangipakpakita a nakaawat ti Davao City ti P460 million a confidential funds iti kada tawen manipod iti 2019 agingga iti 2022.
Nupay kasta, inbatad manen ni Acosta a saanna a malagip iti panangsaludsud ni Ligutan no nakaawat ti ciudad ti sabali manen a P460 million idi 2022, uppat a tawen laeng ti napalabas sakbay a naelektaran kas bise presidente ni Duterte ken maiyakar ni Acosta iti Office of the Vice President.
Ti direct examination iti hostile witness ket paset paylaeng ti panagdengngeg iti misused confidential funds ti Office of the Vice Presidente ken Department of Education iti babaen ni Vice President Duterte, ti alegasyon nga immunan a naglikudan ti kampo ti depensa.
