LAOAG CITY – Nagkamang ni Rossman Mina y Garvida, 43, naasawaan, seaman ken residente iti R9 Lot 2, Laha Hacienda, Bagumbayan, Theresa, Rizal iti PNP Bangui gapu iti napasamak a panagtakaw iti Northwind Hotel iti paset ti National Highway ti Brgy. Nagbalagan iti ili a Bangui.
Basar iti imbestigasyon ti PNP Bangui, nakita iti CCTV camera a simrek ti dua a saan pay a nabigbig a suspek a nakajacket ken nakabonnet iti hotel ken dagus a nagturong dagitoy iti kwarto dagiti biktima.
Naamoan a nalipatan nga inlock dagiti iti ridaw ti kwarto da.
Natakaw ti maysa a brown a Coach shoulder bag a naglaon ti iphone 10 cellphone, iphone 6+, brown a coach wallet a naglaon ti ₱13,000 ken ATM cards ni Jeannie Artiaga; black belt bag a naglaon ti driver’s license, SSS ID ken BDO ATM card ni Jeanette Soriano Abag, BDO ATM card ni Julita Soriano aken cash nga agdagup ti ₱3,000.00; brown Gucci body bag a naglaon iti tulbek ti lugan, driver’s license, firearm’s license, SSS ID, Samsung J7 cellphone ken cash nga agdagup ti $500.00; ken Samsung J7 Pro color ken Samsung C9 Pro.
Narekobre ti brown Coach shoulder bag a naglaon ti brown a coach wallet ken dagiti ATM cards, brown wallet a naglaon ti ID cards, tulbek ti lugan a kukua dagiti biktima iti dayaen a paset ti ruar ti hotel ngem mapukpukaw ti cash ken gadgets.
Iti panaginspeksyon dagiti otoridad, awna iti narekobre da a fingerprints.
Agtultuloy iti panangala da ti CCTV footage iti asideg ti nakapasamakan tapno mabigbigen dagiti suspek.
